Eng 
Рус 
Ի՞նչ քայլեր են սպասվում տուն գնելիս
Անշարժ գույք գնելը կյանքի կարևոր և առանձնահատուկ քայլ է: Մարդկանց շատ քիչ տոկոսն է իր կյանքի ընթացքում կարողանում գնել բնակարան: Հետևաբար, մարդիկ փորձում են պատասխանատու մոտենալ այդ քայլին: Այստեղ փորձենք ներկայացնել որոշ նրբություններ, որոնք կօնգնեն այդ ճանապարհն անցնել առանց լուրջ բարդությունների:
1. Որոշում
Դե ինչ, որոշել եք գնել բնակարան, առաջինը ինչից սկսում են մարդիկ, դա հայտարարությունների դիտումն է։ Սկզբից պետք է հասկանաք թե Ձեր հավանած բնակարանները ինչ արժեն շուկայում: Ապա համադրելով Ձեր ունեցած միջոցների հետ, փոփոխում եք որոնման ֆիլտրերը և աստիճանաբար ուրվագծվում է, թե ինչ կարգի բնակարան եք ցանկանում, քանի սենյականոց, որտեղ, որ հարկում և ինչ գնի սահմաններում:
2. Ֆինանսական կողմ
Հաջորդ քայլը պետք է լինի ֆինանսական կողմը: Եթե Դուք ունեք ամբողջ գումարը, ապա մտածելու ոչինչ չկա։ Եթե ցանկանում եք ձեռք բերել հիփոթեքային վարկի միջոցով, ապա ճիշտ կլինի նախքան բնակարան փնտրելը այցելեք բանկ և վարկային մասնագետի հետ քննարկեք հնարավոր տրվող վարկի չափը, տոկոսադրույքները, տևողությունը և այլն: Վարկային մասնագետը Ձեր ընտանիքի անդամների ընդհանուր եկամուտների, առկա վարկերի կամ պարտավորությունների հիման վրա կհաշվարկի և կասի, թե բանկը ինչքան գումար կարող է տրամադրել և ինչ պայմաններով: Եթե այդ գումարը Ձեր ունեցած միջոցների հետ միասին բավարար է Ձեր ցանկացած գույքը գնելու համար, ապա կարող եք անցնել գույքը փնտրելուն: Սակայն հիշեք, որ բանկը վերջնական պատասխանը կտա միայն բոլոր պահանջվող փաստաթղթերի առկայության դեպքում:
3. Տեղեկացվածություն
Մինչև բնակարանի որոնմանն անցնելը, խորհուրդ ենք տալիս կարդալ մեր կայքում տեղադրված Ինչպե՞ս չխաբվել հոդվածը, այնտեղից կստանաք բավական գիտելիքներ՝ հնարավոր խնդիրներից խուսափելու համար:
4. Բնակարանի փնտրտուք
Բնակարանը կարող եք փնտրել ինքնուրույն թերթելով անշարժ գույքի հայտարարությունների կայքերը: Կամ կարող եք դիմել գործակալի օգնությանը՝ ասելով նրան Ձեր նախապատվությունների մասին: Իսկ նա իրենց բազայում առկա բնականներից կընտրի Ձեզ համապատասխանող տարբերակներ, և կառաջարկի գնալ դիտել:
Միշտ հիշեք, որ տեղադրված հայտարարությունը դա գովազդ է, որի նպատակն է հետաքրքրել գնորդին, այդ իսկ պատճառով այնտեղ գրված չեն լինի բնակարանի թերությունների մասին: Իսկ ամեն բնակարան այցելելու համար բավականին ժամանակ է հարկավոր: Ուստի արժե հեռախոսով խոսելու ժամանակ հարցնել Ձեզ համար կարևոր տեղեկություններ, և բավարարելու դեպքում միայն պայմանավորվել դիտում:
5. Դիտում
Դիտել մեկնելիս արժե ունենալ նախապես պատրաստված ստուգաթերթիկ, որպեսզի չմոռանաք ստուգել բոլոր կարևոր կետերը: Ստորև ներկայացնում ենք, թե ինչի վրա արժե ուղադրություն դարձնել
- Հարևաններ: Սա ամենակարևոր հարցերից մեկն է, քանի որ հարևանները կարող են կյանքը թունավորել նույնիսկ ամենագեղեցիկ բնակարանում: Կարող եք անմիջապես տանտիրոջից հարցնել, թե ինչպիսին են հարևանները: Քանի որ հիմնականում մարդիկ սովորական կյանքով ապրող մարդիկ են, ապա անկեղծ կպատասխանեն, կամ ել ստելու դեպքում Դուք կզգաք նրանց դեմքից որ ինչ որ բան թաքցնում են: Ուշադրություն դարձրեք միջանցքների վիճակին, աստիճանների և վերելակի մաքրությանը, ավելորդ իրերի առկայությանը միջացնքում: Հարգալից և բարեկիրթ հարևանը երբեք իր տան ավելրոդ իրերը չի շարի ընդհանուր միջանցքում այդպիսով խանգարելով մնացածի հարմարավետությանը: Եթե բնակարանը Ձեզ դուր է գալիս, ուրեմն արժե շաբաթվա տարբեր օրերին և ժամերին մի քանի անգամ այցելել, դիտել բակի և շենքի կյանքը, բնակիչների միջև հարաբերությունները և այլն:
- Բնակարանի ընդհանուր վիճակը: Որքա՞ն հին է վերանորոգումը, ի՞նչ վիճակում է այժմ: Ճշտեք էլեկտրական լարերի տեսակը և հնությունը, քայլելիս հատակը կարող է ճռռալ, դռները նույնպես, պատուհանները կարող են նորմալ չփակվել կամ բացվել, պատի պաստառի հետևում կարող է խոնավ լինել։ Սրանք այնպիսի թերություններ են, որոնք բավականին ծախսեր են պահանջում շտկելու համար։ Լինում են դեպքեր, երբ տան տերը վաճառելուց առաջ շատ քիչ գումարով կոսմետիկ նորոգում է անում տան որոշ հատվածներում, ավելի թանկ վաճառելու համար։ Նման վերանորոգումը չի կարող երկար մնալ։
- Ճշտեք ջրամատակարարման գրաֆիկը, կոյուղու վիճակը, օդափոխությունը: Մարտկոցների և խողովակների վրա կաթիլների առկայությունը, սանտեխնիկայի վիճակը, ռադիատորների որակը և քանակը։ Կա՞ն, արդյոք, ջրի հետքեր առաստաղի վրա։ Եթե կան, ապա շատ հնարավոր է, որ վերևի հարևանը հաճախ է ջուր բաց թողնում և չի թողնի իր ջրելու սովորությունը։
- Սարքավորումներ և կահույք։ Պարզաբանեք, թե ի՞նչն է մնում բնակարանում և ինչը՝ ոչ:
- Ճշտեք նաև շենքի հարակից տարածքի մասին ինֆորմացիա։ Տրանսպորտ, ավտոկայանատեղի, խաղահրապարակ, դպրոց, մանկապարտեզ, սուպերմարկետ: Արդյոք երեկոյան ժամերին հանգիստ է լինում բակում թե՞ աղմկում են:
Դիտելիս պարտադիր խնդրեք ցուցադրել բնակարանի սեփականության վկայականը։ Թե ինչ խաբեություն կարող է լինել վկայականի բացակայության դեպքում նկարագրել ենք Ինչպե՞ս չխաբվել հոդվածում:
6. Գնային բանակցություններ
Դե ինչ, բնակարանը հավանեցիք, և ցանկանում եք գնել այն: Կարող եք սկսել սակարկել:
Վաճառվող բնակարանների գրեթե 100%-ը սակարկման ենթակա է: Վաճառողը միշտ իր մտքում ունի իր համար կարմիր գիծ, թե ինչքան կարող է իջնել: Ձեր իրավունքն է փորձել շոշափել այդ սահմանը և գնել բնակարանը այդ սահանին հնարավորինս մոտ գումարով: Անհրաժեշտ է ընտրել իրական փաստարկներ: Լավագույն փաստարկը նմանատիպ բնակարանի առկայությունն է, բայց ավելի էժան կամ նույն գնով։ Արժե կենտրոնանալ վաճառքի հայտարարության մեջ բնակելի տարածքի նկարագրության և իրական վիճակի միջև եղած անհամապատասխանությունների վրա։ Օրինակ, հայտարարության մեջ նշվում է, որ բնակարանի խոհանոցի տարածքը 9քմ է, բայց իրականում 8,3քմ է:Սա լուրջ տարբերություն է: Կամ գրված է, որ մետրոյի կայարանից մինչեւ բնակարան քայլելը տևում է հինգ րոպե, բայց իրականում տևում է տասնհինգ րոպե:
Դուք չպետք է շատ նախանձախնդիր լինեք բնակարանի թերությունները հայտնաբերելու հարցում։ Լավագույնն ընդհանուր առմամբ խոսելն է օբյեկտիվ թերությունների մասին, այլ ոչ թե «դիզայների անճաշակության» կամ «մուտքի գարշահոտության» մասին: Գինը իջեցնելու փաստարկները կարող են լինել էական թերությունները։
Եթե իրական փաստարկներ չունեք և հասկանում եք, որ բնակարանի գինը շուկայական է, նմանատիպ տարբերակներ չկան, և բնակարանը Ձեզ լիովին համապատասխանում է, կարող եք պարզապես հարցնել. «Կարո՞ղ եք ինչ-որ գումար սակարկել»:
7. Նախնական պայմանագիր
Գինը պայմանավորվելուց հետո վաճառողն ու գնորդը նախնական պայմանագիր են կնքում: Եթե աշխատում եք գործակալության միջոցով և տվյալ գործակալությունը լիցենզավորված է նմանատիպ պայմանագիր կնքելու համար, ապա պայմանագիրը կնքվում է եռակողմ՝ գնորդ, վաճառող, միջնորդ։ Կարող եք կնքել նաև նոտարի միջոցով, եթե առանց գործակալության եք աշխատում: Պայմանագրում թվարկվում է առաջիկա գործարքի հիմնական քայլերը․ երբ, ինչպես և որտեղ են կատարվելու, ինչպես է վճարվելու:
Նախնական պայմանագիր կնքելիս վճարվում է կանխավճարը (500-1000 դոլարին համարժեք գումարի չափով): Նախնական պայմանագրով վաճառողը պարտավորվում է չվաճառել տվյալ գույքը նշված ժամանակահատվածում մեկ ուրիշին, իսկ գնորդը պարտավորվում է նշված ժամանակահատվածում գնել տվյալ գույքը, այլապես վճարված կանխավճարը մնում է վաճառողին առանց որևէ այլ պարտավորության:
8. Վաճառք
Նախնական պայմանագրի ստորագրման և կանխավճարի փոխանցումից հետո սկսում է առք և վաճառքի ընթացքը։ Վաճառքի փուլը որպես առանձին հոդված տեղադրված է մեր կայքում հետևյալ հղումով՝ Վաճառքի գործընթաց:
