Ինչպե՞ս չխաբվել անբարեխիղճ գործակալների կողմից

• մայիսի 22, 2021

Ինչպես ցանկացած ոլորտում, այստեղ նույնպես լինում են խաբեություններ: Կփորձենք այս հոդվածում ներկայացնել ամենատարածվածները: Նախ պետք է հասկանաք, որ գործակալների մեծ մասը չունի ֆիքսված աշխատավարձ, նրանք գումար են աշխատում միայն գործարք իրականացնելիս՝ ստանալով իրենց հասանելիք միջնորդավճարը: Այդ իսկ պատճառով որոշ գործակալներ կարող են դիմել հատուկ հնարքների, որպեսզի գործարքն իրականանա: Հաճախ այդ հնարքներից տուժում են թե գնորդները, և թե գույքը վաճառողները:

Հիմնականում այդ հնարքների արդյունքում Դուք կկորցնեք ժամանակ և նյարդեր, սակայն լինում են նաև խարդախություններ` քրեորեն պատժելի, որի արդյունքում կարող եք կրել ֆինանսական լուրջ կորուստներ, ուսի խորհուրդ ենք տալիս կարդալ ամբողջությամբ և լինել տեղեկացված:

Կեղծ բնակարան

Այս սխեման կոչվում է կեղծ բնակարան: Միջնորդները հազարավոր հայտարարություններ են տեղադրում գոյություն չունեցող կամ վաղուց արդեն վաճառված բնակարանների մասին: Դա արվում է գնորդին որսալու համար:

Երբ զանգահարեք Ձեր նախընտրած բնակարանի համար, Ձեզ կասեն, որ այն արդեն վաճառվել է կամ այլևս չի վաճառվում, բայց կասեն որ կա ևս մեկը, որն ավելի լավն է և կարող եք պայմանավորվել և տեսնել այն: Այս խաբեության արդյունքում գործակալը հաճախորդներ է գտնում:

Գինը սովորաբար ցածր է և գրավիչ: Նման գովազդի նպատակը միայն հաճախորդ որսալն է:

Հայտարարություն իբր սեփականատեր

Կան մարդիք, ովքեր ցանկանում են գնել բնակարան առանց միջնորդի: Պատճառները կարող են լինել տարբեր, կամ ունեն դառը փորձ միջնորդների հետ շփումներում, կամ ուզում են խնայել միջնորդավճարը, կամ այլ պատճառով: Նման մարդիք քիչ չեն, և հայտարարություն որոնելիս որոնման կայքերում նշում են, որպեսզի ցուցադրվեն միայն առանց միջնորդ հայտարարությունները: Ինչի պատճառով գործակալը բաց է թողնում այդ գնորդներին վաճառելու հնարավորությունը: Դրա համար շատ գործակալներ ունենում են բացի հիմնական հեռախոսահամարից նաև երկրորդ հեռախոսահամար, որով նրանք տարբեր կայքերում հայտարարություններ են տեղադրում որպես սեփականատեր։ Ազնիվ գործակալները իրենց զանգելուց կասեն որ իրենք միջնորդ են, սակայն կարող են հանդիպել նաև անբարեխիղճ միջնորդներ, ովքեր սկզբից տեղյակ չեն պահի, և միայն բնակարանը դիտելուց և հավանելուց հետո կասեն դա, և կպահանջեն միջնորդավճար: Արդյունքում կրկին խաբված գնորդ, ծախսված ժամանակ և նյարդեր:

Ի ուրախություն մեր կայքի այցելուների, մենք մինիմալացրել ենք գործակալների կողմից իբր սեփականատեր հայտարարություններ տեղադրելու հնարավորությունը :

Ընկերների բնակարան, ես օգնում եմ վաճառել

Նման գործակալները հաճախ գրում են, որ բնակարանը սեփականատիրոջից է: Իսկ զրույցի ժամանակ ներկայանում են որպես ազգական, հարևան, ընկեր և/կամ ասում են, որ ուղղակի օգնում են վաճառել: Դուք կարծում եք, որ կարող եք գնալ և տեսնել, և գնելու դեպքում միջնորդավճար չի լինի։

Արդյունքում, երբ գալիս եք բնակարան, պարզ է դառնում, որ նա սովորական միջնորդ է, և միջնորդավճար է ուզում: Արդյունքում կրկին ծախսված ժամանակ և նյարդեր:

Սարսափելի բնակարանների շղթա

Շատ տարածված տեխնիկա: Գործակալին ներկայացնում եք Ձեր ցանկությունները, թե ինչպիսի բնակարան եք ցանկանում գնել: Նա ասում է, որ ունի հիանալի առաջարկներ, և կպայմանավորվի դիտում: Սակայն Ձեզ կցուցադրի բնակարաններ, որոնք մասամբ են համապատասխանում Ձեր ցանկություններին և սարսափելի վիճակում են: Նման բնակարաններից ուզում եք անմիջապես հեռանալ: Սովորաբար 3-4 նման բնակարան են ցույց տալիս: Որպեսզի հիասթափվեք և հետագայում ավելի հեշտ ընտրություն կատարեք։ Գործակալն ասում է, որ ցուցադրած բնակարանները շուկայում տվյալ գնով ամենալավ առաջարկներն են: Դուք հիասթափվում եք և կարծում, որ չեք գտնի բնակարան Ձեր սրտով։ Եվ ահա հոգեբանական հնարք։ Միջնորդը զանգահարում է և ասում, որ հենց նոր լավ առաջարկ ստացավ, որը եթե չհասցնեք գնել ապա ժամերի ընթացքում մեկ ուրիշը անպայման կգնի: Կազմակերպում է դիտում, բնակարանը մնացած ցուցադրածների ֆոնին ուղակի հրաշք է, և բավարարում է գնորդի ցանկություններին: Գնորդը անմիջապես որոշում է կայացնում և գնում բնակարանը: Այնինչ տվյալ տարբերակը ի սկբանե առկա էր, և այն չունի ոչ մի առանձնակի առավելություն: Արդյունքում ճիշտ է գնորդը գնում է բնակարանը, բայց իրականում նա չի ունեցել ընտրության հնարավորություն, որի առկայության դեպքում գուցե կընտրեր մեկ այլ բնակարան:

Կեղծ գնորդներ

Ցուցադրության ժամանակ Ձեզ շտապեցնում են և թույլ չեն տալիս հանգիստ որոշում կայացնել գնման վերաբերյալ: Եթե գործակալը հասկանում է, որ դուք կհավանեք բնակարանը ապա նա կարող է այն պահին, երբ Դուք դիտում եք բնակարանը կանչել լրացուցիչ գնորդներ, կամ իր ընկերներին իբր գնորդներ և ստեղծել թվացյալ մրցակցություն տվյալ բնակարանի համար: Այսպիսով դուք հանգիստ չեք կարողանում դիտել և գնահատել, իսկ ամենակարևորը, եթե բնակարանը Ձեզ դուր է գալիս, ապա Դուք կվախենաք, որ մեկ ուրիշը կարող է գնել այն, եթե դուք հապաղեք:

Նույն կերպ, գործակալը կարող է պայմանավորվել ընկերոջ հետ, ով դիտման պահին կզանգահարի իրեն, և իբր գնորդ, կառաջարկի գինը մի փոքր իջնելու դեպքում հենց այսօր վճարել կանխավճարը: Գործակալը կասի Ձեզ այդ մասին, և կասի, որ եթե Դուք համաձայն եք առանց սակարկելու գնել այն, ապա բնակարանը Ձերն է, հակառակ դեպքում նա կվաճառի սակարկված գնով քիչ առաջ զանգահարած գնորդին: Արդյունքում Դուք գնում եք գործարքի:

Դիտում այն ժամանակ, երբ թերություններ չկան

Գործակալը ձեզ չի ասի բնակարանի թերությունների մասին: Դա նրա համար պարզապես ձեռնտու չէ: Գործակալի խնդիրն է վաճառել: Եթե օրինակ հարևանը հարբեցող է՝ Ձեզ բնակարանը ցույց կտա առավոտյան, երբ նա քնած է: Եթե երեկոյան աղմկում են հարևանները՝ ապա Ձեզ ցույց կտա բնակարանը կեսօրին: Եթե պատուհանից տեսարանը հաճելի չէ, ապա անկասկած կցուցադրվի միայն երեկոյան: Օրինակ ՝ պատուհանից երևում է գերեզման, գործարաններ կամ աղբավայր: Եվ այդպիսի պահերը շատ են:

Մենք օրինական կարգով ստուգում ենք բնակարանը

Բնակարանի վաճառք իրականացնելիս կարող են պարզվել իրողություններ, որոնք կխոչընդոտեն վաճառքի իրականացմանը կամ կերկարացնեն պրոցեսը: Օրինակ՝ բնակարանը կարող է ունենալ մի քանի սեփականատեր, որոնցից մեկը գտնվում է արտերկրում, իսկ ուղարկված լիազորագիրը ապոստիլով հաստատված չէ, այսինքն վավեր չէ: Կամ բնակարանը ունի վկայականում չգրանցված սեփականատեր, ով համաձայն չէ վաճառել բնակարանը, կամ բնակարանը գրավադրված է: Այսպիսի դեպքեր կարող են շատ լինել: Նմանատիպ իրավիճակները պարզելու համար նախ պետք է գործակալը տեղյակ լինի հնարավոր խնդիրներից, և երկրորդը՝ պետք է բավարար ժամանակ տրամադրի այդ ամենը ճշտելու համար: Քանի որ գործակալը միաժամանակ աշխատում է տասնյակ, եթե ոչ հարյուրավոր տների հետ, ուստի ուղղակի ալարում է այդ ամենին ժամանակ տրամադրել:

Սակայն Ձեզ վստահեցնում է, որ ստուգում է բնակարանը և բնակարանի փաստաթղթերը:

Այս խաբեությունը կարող է լուրջ խնդիրներ առաջացնել այն գնորդների համար, ովքեր բնակարանի գնելու համար ունեն սահմանափակ ժամանակ, օրինակ՝ մեկ ամսով եկել են արտերկրից և պետք է շտապ գնեն բնակարան և վերադառնան: Այս դեպքում շատ տհաճ իրավիճակ է ստեղծվում, երբ վերջին պահին, նոտարի մոտ պարզվում է, որ փաստաթղթերում խնդիրներ կան և գործարքը հնարավոր չէ իրականացնել:

Կեղծ գնորդ, հետախուզում, հայտարարության վերահրապարակում

Շատ դեպքերում տան սեփականատերը պահանջում է, որպեսզի գործակալը այցելի իրական գնորդի առկայության դեպքում: Ինչը հասկանալի է, երբ մարդը չունի բավական ժամանակ ամեն մեկի համար կազմակերպի դիտում: Սակայն որոշ գործակալներ, որոնք ցանկանում են անձամբ տեսնել բնակարանը կարող են ընկերոջ հետ գալ բնակարանը դիտելու՝ ներկայացնելով նրան որպես գնորդ: Այցելության ժամանակ գործակալը կնկարահանի բնակարանը, ընկերը կփորձի սակարկել և արդյունքում գործակալը կունենա ամբողջական ինֆորմացիա թե բնակարանից և թե սեփականատիրոջ կողմից գնի հնարավոր սակարկումից: Հետագայում նա կարող է տեղադրել Ձեր տան հայտարարությունը իր նկարած նկարներով և գինը նշել արդեն սակարկված գնով: Արդյունքում նրա հայտարարությունը կլինի ավելի գրավիչ, քան Ձեր կողմից տեղադրվածը: Իհարկե, եթե Դուք գտնեք իր կողմից տեղադրված հայտարարությունը և դեմ լինեք, ապա կարող եք բողոքել կայքի ադմինիստրատորին, և նրա հայտարարությունը կհեռացվի, սակայն այդ ծավալների մեջ հետևել և գտնել այդպիսի հայտարարություններ բավականին ժամանակատար է:

Վաճառք կամ վարձակալություն, բայց ոչ սեփականատիրոջ կոմից

Այս խաբեությունը քրեորեն պատժելի արարք է և դասվում է խարդախությամբ դրամ շորթելուն:

Խաբեբան վարձակալում է բնակարան մի քանի օրով կամ շաբաթով: Այնուհետև տեղադրում է գրավիչ հայտարարություն երկարատև վարձակալության կամ վաճառքի մասին:

Գնորդը կամ վարձակալողը, անտեղյակ լինելով, գալիս դիտում և հավանում է բնակարանը: Խաբեբան կարող է օգտագործել վերը նշված հնարքները, որ ստեղծի մրցակցության տպավորություն, որպեսզի գնորդը առանց հապաղելու որոշում կայացնի: Վարձակալության դեպքում նա պահանջում է միանգամից մի քանի ամսվա գումար: Վաճառքի դեպքում պահանջում է կանխավճար (բեհ): Ավելի վստահելի երևալու համար, կարող է տալ բնակարանի բանալիները և ասել, որ կարող եք հենց այօրվանից ապրել այստեղ, մինչև գործարքը կիրականացվի: Այսպիսով վերցնել գումարը և անհետանալ: Իսկ հաջորդ օրը կգա իրական սեփականատերը և Դուք ստիպված կլինեք հեռանալ բնակարանից խափված և գումար կորցրած։

Նման դեպքերում պետք է պահանջեք ցուցադրել սեփականության վկայականը, նրա անձը հաստատող փաստաթուղթը, և վստահ լինելով, որ նա է իրական սեփականատերը՝ միայն այդ դեպքում շարունակել գործարքը: Եթե գործ ունեք խաբեբայի հետ, նա ամեն կերպ կփորձի շրջանցել, կասի որ վկայականը հիմա իր մոտ չէ, պետք է սպասեք, իսկ բնակարանը ցանկացողները շատ են, չեք ուզում ուրեմն ուրիշին կտա: Այսպիսի վարք տեսնելուց պետք է ուղակի հրաժարվեք, քանի որ ամենայն հավանականությամբ գործ ունեք խաբեբայի հետ:

Կանխավճար

Բնակարան գնելուց առաջ վճարվում է կանխավճար, որը հաստատում է Ձեր պատրաստակամությունը տվյալ գույքը գնելու հարցում, և պարտավորեցնում է սեփականատիրոջը գույքը ուրիշին չվաճառել: Ոչ մի դեպքում գումար մի տվեք առանց պայմանագրի։ Նման պայմանագրեր կարող եք կնքել նոտարի մոտ, կամ իրավաբանական գործառույթներ իրականցնելու լիազորություն ունեցող լիցենզավորված գործակալությունների հետ։

Ամփոփում

Այս հոդվածում ներկայացրեցինք տարածված խաբեություններն ու հնարքները: Կարող են լինել այլ իրավիճակներ ևս: Եթե Դուք խաբվել եք այլ իրավիճակում, կամ տիրապետում եք այլ խաբեության ձևերի և ցանկանում եք կիսվել մարդկանց հետ, կարող եք գրել մեզ, մենք կավելացնենք այն այս հոդվածում:

Համեյան դեպս խաբեությունները ավելի շատ բացառություն են քան օրինաչափություն:

Հայաստանում գործող գործակալությունների մեծ մասն աշխատում են պատշաճ կերպով, իսկ վերը նշված դեպքերից շատերը կարող են պատահել պատահական առանց խաբեության միտումի:

Ուստի եղեք տեղեկացված և եղեք ուշադիր, այդպիսով կնվազեցնեք Ձեր խաբված լինելու հավանականությունը: